OК Струмица 47&72 е клуб кој во 2008 година обединува два спортски ентитети ОК Струмица и ОК Македонија (машката екипа) и од сезоната 2008/2009 се натпреварува под ова име.
ОК Струмица е основана во 1947 година и во рамките на СФРЈ без прекин настапува во сите лиги, а во сезоната 1984/85 е дел и од Првата Сојузна Лига. На СП 1972 во Бугарија, одбојкарот на ОК Струмица, Никола Донев е првиот сениорски репрезентативец на Југославија. ОК Македонија (поранешен ОК Југославија) е основан во 1972 година со машка и женска екипа. Во рамките на СФРЈ машкиот тим без прекин и со успех настапувал во Републичката лига, додека женската екипа и во Втората Сојузна Лига.
ОК Струмица е првиот македонски шампион по осамостојувањето на Македонија во 1993 година и е еден од најуспешните клубови со освоени 12 шампионски титули и девет куп-титули во сениорска конкуренција. Клубот е прв македонски претставник во ЦЕВ Лигата на шампионите, а на меѓународен план има повеќе учества во ЦЕВ европските клупски купови и БВА купот. Клубот е вистински расадник на одбојкари кои со успех го носеа националниот дрес во сите категории, а голем дел од нив направија и успешни интернационални кариери.
ОК Струмица следната година ќе слави јубилеј „80 години одбојка во Струмица“.
