Финалето во македонската машка одбојка ќе биде конкурентно како ретко кое во последните неколку години. Одбојкарите на Штип УГД израмнија во серијата против Струмица 47&72 откако го добија денешниот натпревар во својата сала со 3:1 (30:28, 17:25, 25:20, 25:21). Освојувачот на годинашниот куп ја искористи предноста, а тоа значи дека во битката за тронот ќе има уште најмалку два натпревара затоа што пехарот ќе го освои екипата којашто прва ќе оствари три победи.
Наредната средба е во Струмица, на теренот на составот со девет титули од 2012-та досега. Неприкосновениот тим во македонската одбојка во последната деценија сезонава има биланс 4-2 против ривалот во лигашкото финале, но за да го одбрани тронот и да му се реваншита на Штип УГД за одземениот пехар во купот, треба да слави уште двапати. Првата шанса ќе ја има в понеделник, а доколку штипјани направат „брејк“, тогаш ќе имаат меч-топка пред своја публика.
Финале (мажи) – до три добиени натпревари
Струмица 47&72 – Штип УГД 3:1 (25:19, 25:18, 23:25, 25:22)
Штип УГД – Струмица 47&72 3:1 (30:28, 17:25, 25:20, 25:21)
Струмица 47&72 – Штип УГД (понеделник 22.04.2024, МРТ-3, 19.00)
Штип УГД – Струмица 47&72 (четврток 25.04.2024)
Струмица 47&72 – Штип УГД (недела 28.04.2024)
