Победа за крај! Машката одбојкарска репрезентација на Македонија го победи Израел со 3:0 (25:21, 25:23, 25:22) во последниот натпревар од групната фаза на Европското првенство 2026 во Софија.
Во натпревар во кој немаа што да загубат откако претходно останаа без шанси за осминафиналето македонските одбојкари го одиграа најдобриот натпревар на континенталниот собир и победнички си заминуваат од арена “8888”.
Она што го чувствуваа како тежина, притисок и разочарување по поразот од Португалија нашите одбојкари го претворија во успех и радост и позитивна одјава од уште едно големо натпреварување.
Како по ноти играа одбојкарите, сите линии функционираа беспрекорно и на мрежата и во полето. Одлучни беа репрезентативците да потврдат дека не случајно се на ЕвроВолеј 2026, а истовремено успеаја и да стават крај на негативната серија која ја имаат со Израелците во последниве неколку години.
Капитенот Никола Ѓоргиев со 20 поени и Стојан Илиев со 14 поени беа лидери на репрезентацијата, следени од Александар Љафтов со девет поени, Филип Маџунков со седум, односно Филип Савовски со пет поени.
Со оваа победа Македонија заврши на петтата позиција во групата Б и со тоа и го заврши и настапот, а заедно со неа од ЕвроВолеј се прости и Израел, додека Полска, Украина, Бугарија и Португалија продолжуваат во елиминациите.
