По успешното деби во ЦЕВ Лигата на шампионите на македонскиот женски претставник, Јанта Волеј Кисела Вода и победата од 3:2 над Гацко во првото соочување во Скопје, попладнево 18 часот, во салата „Олимп“ во Требиње се игра реваншот од втората квалификациска рунда.
Тимот на Никола Јаневиќ е на чекор до историја, но прво мора да одигра на истото ниво или подобро од првиот меѓусебен дуел. Екипата одлично се аклиматизираше во Требиње, го одработи и утринскиот тренинг како загревање за дуелот, а расположението е на високо ниво.
„Вториот европски натпревар за екипата е всушност прво историско гостување, па затоа и возбудата е голема кај комплетниот тим. Првиот дуел во Скопје беше остварување на сонот, со среќен крај, како резултатски, така и организациски, и ќе остане запишан не само во клупската историја, туку и воопшто во историјата на македонската женска клупска одбојка“, коментира Татјана Јаневиќ, средниот блокер и една од најзаслужните за триумфот минатата седмица, а потоа додава: „Добро знаеме што не очекува во реваншот! Гацко ќе сака да се реваншира за поразот, тие ќе ја имаат поддршката од домашната публика и сигурно не очекува уште потежок натпревар. Ги измеривме силите на терен, знаеме што да очекуваме, ги анализиравме нивните слабости и се надевам дека ќе ја искористиме шансата и ќе останеме во игра во Лигата на шампионите. Имаме убава можност и верувам дека екипата има квалитет за поголеми спортски резултати.“
Натпреварот меѓу Гацко и Јанта Волеј КВ ќе има директен ТВ пренос на регионалниот канал Арена Спорт 7.
