Актуелниот шампион во женска конкуренција Работнички Скопје е освојувач на „Чајка“ Супер купот на Македонија 2026 откако со 3:0 (25:16, 25:23, 25:21) славеше над носителот на куп-пехарот ЖОК Вардар ЕМ, пред полната сала „8. Септември“ во Тетово.
Работнички Скопје имаше сигурно отворање на дуелот и направи сериозна предност, додека вардарки делуваа како да им е потребно дополнително време за да “влезат” во мечот. Со сигурни 25:16 шампионот поведе со 1:0.
Во продолжението Вардар ЕМ понуди многу посилен отпор. Ги консолидираше редовите и се бореше егал во следните два сета. Имаше резултатска неизвесност, пресврти и убави поени во кои двете екипи најавија дека престојната сезона во Првата женска лига ќе понуди квалитет и многу возбудувања.
Одбојкарките на актуелниот шампион предводени од МВП играчот Тамара Атанасова останаа поконцентрирани во клучните моменти од средбата и стигнаа до првиот Супер куп трофеј во клупската историја.
Машкиот и женскиот натпревар од „Чајка“ Супер купот на Македонија на вистински начин го обележаа ликот и делото на основоположникот на спортот и одбојката во Тетово, Бранко Хаџииљоски – Чајка, чии меморијал оваа година прослави петдецениски јубилеј.
