Претседателот на Одбојкарската федерација на Македонија, Петар Јовановски и членот на Извршниот одбор на ОФМ, Кирил Калеников беа дел од панелистите на регионалниот спортски самит „Скопје 2025“, кој под покровителство на Министерството за спорт на Република Македонија, денеска се одржа во хотелот „Хилтон“ во Скопје.
На Самитот под мотото „Спортот како национален идентитет и визија за иднината“ се одржаа девет панели на повеќе теми од областа на спортот на кои дискутираат претставници на спортски федерации и клубови, истакнати, претставници на институции, медиуми, приватни компании, спонзори, тренери со заедничка мисија – да се истакне улогата на спортот во современото општество, размената на искуства и поттик на регионалната соработка во спортската сфера.
Претседателот Јовановски беше дел од дискусијата на темата „Национална стратегија за развој на спортот 2025-2030“ заедно со министерот за спорт, Борко Ристовски, како и претседателите на Фудбалската, Ракометната и Кошаркарската федерација на Македонија, додека Калеников учествуваше во дискусија на темата „Младински спорт и развој на таленти“.
Самитот имаше за цел да ја постави Македонија како центар на регионалната спортска соработка, место каде спортот ја покажува својата најголема сила – да ги обединува луѓето, државите и културите, што беше потврдено и со присуството на министрите за спорт од регионот – Зоран Гајиќ од Србија и Драгослав Шќекиќ од Црна Гора, кои заедно со македонскиот министер за спорт Борко Ристовски говореа на првиот панел на Самитот „Како спортот ја обликува иднината на Балканот: Преку соработка до успех“.
Министрите од трите земји се согласија дека регионалната соработка е клучна за развојот на спортот, инфраструктурата и младите таленти, како и за градење заедничка визија за иднината на Балканот.
