Историска шампионска титула за одбојкарите на Штип УГД кои со 3:0 (25:18, 25:18, 25:16) го победија ГОК Борец во третиот натпревар од финалето на плејофот во Првата лига мажи и во три чекори, односно со 3-0 во финалната серија стигнаа до епитетот првак на Македонија.
Клубот откако пред помалку од еден месец го крена куп пехарот, денеска ги обедини круните и ја потврди апсолутната доминација кај мажите, за голема радост и задоволство на полната сала „Јордан Мијалков“ во Штип.
Во последниот натпревар Штип УГД покажа голема решителност експресно да ја затвори финалната серија и имаше комплетна контрола над резултатот и случувањата на теренот, помалку грешеше и се радуваше на крајот. Со овој триумф штипскиот состав стигна до седмата победа во исто толку меѓусебни натпревари сезонава против О.К. Борец Велес.
Михајло Мирасчиев со 12 поени, како и Задмард, Џуниор Илиев со по осум го предводеа Штип, додека кај ГОК Борец, Бастос со 8 и Оливеира со 7 поени беа најрасположени.
Штип УГД сезоната 2025/2026 ја заокружува како најуспешна во клупската историја со обединување на двете круни и со само еден загубен натпревар во текот на целата сезона.
