Македонскиот женски првак Јанта Волеј КВ имаше одлична деби сезона во ЦЕВ Лигата на шампионите во која одигра четири натпревари и беше на чекор до влез во групната фаза. Елитниот сон за одбојкарките на Никола Јаневиќ заврши синоќа, на гостувањето кај Волеро Ле Кане, откако во реванш-дуелот од третата рунда од квалификациите загубија со 3:0 (25:6, 25:13, 25:13).
Разликата во квалитетот и искуството беше видлива уште на првиот меч во Скопје, додека вчера противникот само ја потврди фаворитската улога и остана во најелитното европско клупско натпреварување.
Во возвратниот дуел коректорот Мери Бошковска имаше седум поени, Ана Ѓоргиевска запиша шест поени, Јасмин Ледесма пет поени, додека Бојана Мароевиќ реализираше четири поени.
Со две победи над Гацко и два порази од Волеро Ле Кане, одбојкарките на Јанта го завршуваат настапот во најсилното европско клупско натпреварување, но ќе продолжат да се натпреваруваат во меѓународни рамки.
Следен предизвик за нив ќе биде првата рунда од ЦЕВ купот, каде ги очекува двомеч со хрватски Младост Загреб на почетокот на декември.
