Деби од соништата во ЦЕВ Лигата на шампионите имаа одбојкарките на македонскиот првак, Јанта Волеј Кисела Вода, кои со 3:2 (25:21, 21:25, 25:22, 20:25, 18:16) го победија претставникот на БИХ, Гацко, во првиот натпревар од втората рунда од раната фаза во елитното европско клупско натпреварување.
Во одлична атмосфера во СЦ “Јане Сандански” во Скопје, тимот на Јанта, предводен од македонската репрезентативка Мери Бошковска имаше постојана предност 1:0 и 2:1 во сетови, за во тај-брејкот во сериозна игра на нерви и по голема драма, на разлика, 18:16 да го освои решавачкиот сет и со конечни 3:2 да стави печат на натпреварот.
Коректорот Бошковска натпреварот го заврши како најкорисен играч и најдобар поентер со реализирани 26 поени. Поддршка имаше и од Јасмин Ледесма со 19 поени, односно Татјана Јаневиќ со 16, како и Бојана Мароевиќ со девет поени.
Реваншот Јанта Волеј КВ го игра на 29 октомври, во салата „Олимп“ во Требиње, од 18 часот.
Одбојкарите на Струмица 47&72, пак, во раната фаза од натпреварите во ЦЕВ Лигата на шампионите, загубија со 0:3 (18:25, 20:25, 19:25) од најтрофејниот романски состав Динамо Букурешт, во дуел кој се одигра во СЦ „Јане Сандански“ во Скопје како увертира на женскиот дуел.
Струмичкиот состав понуди солиден отпор во сите три сета, но противникот не дозволи изненадување и ја оправда фаворитската улога.
Петар Премовиќ во редовите на Динамо Букурешт беше избран за МВП играч на мечот со 14 поени.
Во тимот на Струмица Кристијан Илијев беше најефикасен со девет поени, додека Владо Милев и Јован Милев постигна по осум.
Возвратниот меч струмичани го играат на 28 октомври, од 18 часот, во Букурешт.
