Фасулева: „Минатите години се мачевме да освоиме сет, сега имаме два триумфи во осум дена!“

Две победи по три одиграни натпревари во годинешното издание од ЦЕВ Европската Сребрена лига за женската сениорска репрезентација на Македонија. По историскиот триумф над Луксембург, вчера девојките славеа и над Фарски Острови и тоа на гостински терен.

Се најавуваше пред почетокот на Сребрената лига дека имаме противници по мерка и дека ќе ги бараме своите шанси, но се чини дека тимот на селекторот Стефан Пауновиќ почна полека да покажува и зрелост и карактер.

„За разлика од претходните години кога се мачевме да освоиме сет, сега имаме две победи во осум дена, пресреќни сме. Ако на натпреварите во Струмица бевме во грч, сега во натпреварот влеговме постабилно, посамоуверено и точно знаевме што сакаме на теренот. Навистина сум горда на екипата“, задоволно констатира Ана Фасулева, една од најефикасните одбојкарки на теренот против Фарски Острови.

Фасулева, заедно со Теа Терзиевски запишаа по девет поени против домаќинот на вториот турнир, а се чини дека репрезентативките и слично размислуваат.

„Вистина е дека не знаевме многу за Фарски Острови како ривал, но влеговме фокусирани и го испочитувавме договореното. Си помагавме една на друга, си бевме поддршка и добро функциониравме во сите елементи. Во вториот сет како да застанавме, му дозволивме и на противникот да се разигра, но експресно се вративме во ритам и ја завршивме работата како што треба“, вели Терзиевска и додава: „Сега следно не очекува Австрија попладнево. Противник кој одлично го познаваме, важи за фаворит, но мислам дека почнавме да веруваме многу повеќе самите во себе и нема однапред да се предадеме.“

По седуммесечна пауза во игра се врати и организаторот на играта Ерјона Јонузи и тоа победнички.

„Прв натпревар по седум месеци и тоа со победа, навистина сум пресреќна. Имавме многу убава атмосфера за игра во полето, многу добра енергија меѓу нас девојките и тоа се одрази и на резултатот. Втора победа во трет натпревар – одлично! Денеска играме со Австрија, но нема предавање! Тие се фаворити, но и ние ќе се бориме. Очекувам да ја повториме добрата игра, се надевам дека ќе покажеме дека сме попаметни и нема да ги повториме грешките од Струмица и посакувам позитивен резултат.“

Македонија попладнево, 18 часот, по македонско време игра со Австрија во салата „Дал Сандур“ на Фарски Острови.