Вториот турнир од ЦЕВ Европската Сребрена лига женската репрезентација го игра викендов на Фарски Острови. Селекторот Стефан Пауновиќ ќе смета на 12 одбојкарки за престојните два натпревари, со домаќинот Фарски Острови, односно Австрија.
Промената во составот е што во игра се враќа Ерјона Јонузи. Организаторката на играта, која закрепнува од повреда го пропушти првиот турнир во Струмица, но затоа добива шанса на вториот. На списокот ги нема Пандева, Василевска и Антеска кои ќе одмораат викендов.
Одбојкарките ноќва тргнуваат на пат за Фарски Острови, каде треба да пристигнат утре попладне.
Првиот натпревар Македонија го игра в петок, од 20 часот по македонско време против домаќинот Фарски Острови, додека в сабота од 17 часот ќе се соочиме со вториот противник на овој турнир – Австрија.
По првиот натпреварувачки викенд Македонија има скор од една победа и еден пораз и е на шестото место на табелата.
