Најдобрите македонски одбојкарки од денеска до недела во СС „Парк“ во Струмица ќе бидат домаќинки на еден од трите турнири во првиот натпреварувачки викенд од годинешното издание во ЦЕВ Европската Сребрена лига.
Македонија ќе се соочи со Луксембург и Швајцарија, противници со кои може да се носиме и надигруваме. Селекторот Стефан Пауновиќ две недели ја темпираше формата на екипата во одлична работна атмосфера и во неколку наврати потенцираше дека девојките се мотивирани и расположени за докажување. Истото го потврдува и во пресрет на натпреварите.
„Задоволен сум од она што го сработивме изминатиов период. Подготвени сме, но ќе одиме чекор по чекор. Прво мислиме на Луксембург, противник со кој може да ги мериме силите. Тие не доаѓаат во состав кој го очекувавме, но сметам дека имавме доволно информации, анализиравме, тактички се подготвувавме и сега останува тоа да го пренесеме на терен. Добрата подготовка во комбинација со одличната атмосфера која ја имаме во екипата мислам дека е добитна комбинација. Сите сме позитивни, мотивирани и со нетрпение го очекуваме стартот. Мора да бидеме мирни, да ја играме нашата игра и одиме полека поен за поен, сет по сет – имаме што да покажеме“, вели селекторот Стефан Пауновиќ.
Македонија, вториот настап во ЦЕВ Европската Сребрена лига го стартува вечерва од 20 часот, кога го пречекува Луксембург. Утре, во второто коло нашите девојки се слободни, додека Луксембург игра со Швајцарија од 20 часот. В недела македонската репрезентација ќе ги измери силите со Швајцарија. Поддршката од публиката во СС „Парк“ во Струмица ќе биде и тоа како неопходна на патот до прва европска радост по долго време, а селекторот вели дека одбојкарките заслужуваат да играат пред полни трибини.
„Се надевам дека публиката ќе ја препознае шансата која ја имаат овие девојки и ќе дојде да им даде поддршка. Влезот е слободен, а сигурен сум дека за нив ќе биде дополнителен мотив и сатисфакција да играат пред полни трибини.“
Натпреварите од првиот турнир од ЦЕВ Европската Сребрена лига во женска конкуренција ќе имаат и директен телевизиски пренос на националниот сервис.
