Одбојкарите на Струмица 47&72 со победа од 1:3 (23:25, 25:22, 19:25, 21:25) на гостувањето кај Штип УГД во првиот натпревар од финалето на плеј-офот ја стартуваа одбраната на шампионската титула.
Штип УГД важеше за фаворит во пресрет на дуелот, со оглед на тоа дека во последните три меѓусебни соочувања со струмичани, меѓу кои и финалето од Купот на ОФМ, забележаа победи. Но, на теренот во салата „Јордан Мијалков“ во Штип, ситуацијата беше поинаква.
Од самиот старт на средбата се чувствуваше притисокот во тимот на Кристијан Ристески, како и преголемата желба за позитивно отворање на серијата, во која едноставно изгореа. На спротивната страна Струмица беше достојна на шампионската традиција која ја негува и предводена од најискусниот Владо Милев, точно знаеше што сака во првиот меч од финалната серија.
Дуелот изобилуваше со резултатски пресврти, неизвесност и убави поени, но од друга страна гледавме и подеми и падови на екипите, како и голем број на технички грешки, пред се на сервис. Иницијативата во најголемиот дел од средбата ја имаше гостинскиот тим, а за победата во четири сета беше клучен пресвртот во средината на последниот кога негативата од 7:3 и 13:9 успеаја да ја претворат во водство од 15:18, кое го задржаа до самиот крај.
Во редовите на Струмица најрасположени беа Кинтеро со 16, Нилсен со 15 и Милев со 13 поени, додека кај Штип УГД Задмард постигна 15 поени, Арсов имаше 10, додека Багаев 8 поени.
Струмица 47&72 со оваа победа има предност од 1:0 во финалната серија која се игра во три добиени натпревари. Вториот натпревар е закажан за в понеделник, од 19 часот, во салата „Парк“ во Струмица.
