Одбојкарките на Наковски Волеј ја освоија првата куп титула во својата клупска историја откако во финалето на Купот на ОФМ 2025 кај дамите со 3:2 (16:25, 25:18, 10:25, 25:21, 15:13) го победија Јанта Волеј Кисела Вода во одлична атмосфера во салата „25. Мај“ во Радовиш.
Наковски Волеј го играше третото куп финале во кое стигна до премиерниот трофеј, откако на двапати се враќаше од негатива. Финалето со многу подеми и падови и кај едната и кај другата екипа донесе и убави, долги интересни поени, но и убедливи добиени сетови.
Јанта Волеј КВ се надеваше дека со куп пехар ќе го прослави јубилејниот 20. клупски роденден и имаше одлична шанса, водеше 1:0 и 2:1, но дозволи противникот комплетно да се врати во игра и да се радува на крајот.
Тренерот на Наковски, Александар Митев, ја чуваше репрезентативката Љиља Ковачевиќ, како џокер за финалето, а таа натпреварот го заврши како најкорисен играч на завршниот турнир. Заедно со Долдурова, Бојс, Пандева… тимски се изборија за решавачкиот петти сет, во кој знаеа точно што сакаат.
Јанта Волеј КВ не успеја во шестото куп финале во клупската историја да го освои вториот пехар и мораше да се задоволи со сребрен медал.
