Одбојкарите на Штип УГД и Струмица 47&72 ќе се соочат во финалето на завршниот турнир од Купот на ОФМ 2025, кој во организација на Одбојкарската федерација на Македонија и општина Радовиш, се одржува во спортската сала „25. Мај“ во Радовиш.
Штип УГД и Струмица 47&72 ги оправдаа фаворитските улоги кои ги имаа во полуфиналните дуели и борбата за куп пехарот, ќе претставува реприза на ланското финале во Кавадарци.
Штип УГД во првиот полуфинален натпревар со 3:0 (25:13, 25:22, 25:20) го победија тимот на Работнички 71&22. Скопскиот состав се обиде да се спротивстави, особено отпор понуди во вториот и третиот сет, но разликата во квалитет го направи своето.
Во вториот полуфинален дуел Струмица 47&72 немаше посериозни проблеми против Борец, 3:0 (25:13, 25:18, 25:18) Велешани беа мотивирани и се обидоа да се заканат во неколку наврати, но искуството и стабилната игра на фаворитот беше тешко да се наруши.
Финалистите годинава ќе имаат променети улоги, односно Штип УГД ќе биде бранител на титулата, додека Струмица 47&72 ќе се обиде да го врати куп пехарот во своите витрини.
Машкото финале во Купот на ОФМ 2025 ќе се игра в сабота (5 април) од 19 часот, во салата „25. Мај“ во Радовиш. Финалето ќе има и директен телевизиски пренос на националниот сервис.
