По лошиот старт на пролетниот дел од сезоната шампионот Работнички Скопје експресно се врати на победничките патеки и тоа со триумф во пет сета, 2:3 (25:19, 25:14, 22:25, 22:25, 13:15) над еден од директните ривали за титулата, Јанта Волеј КВ, во дербито од 2. коло од втората фаза од Првата женска лига.
Пред полни трибини во салата „Невена Георгиева Дуња“ во Скопје, одбојкарките на Јанта имаа убаво отворање на мечот. Делуваа поангажирано во одбраната во поле и беа поконкретни во нападите на мрежата, па тоа им донесе предност од 1:0 во сетови. Особено убедливо делуваа во вториот сет, во кој имаа константно висока предност 19:9, 21:11, за рутински да дојдат до 2:0 во сетови.
Имаше шанса домаќинот да ја заврши работата во три сета, водеше со 12:9 во средината на третиот сет, а беше во игра и до 17:17, но бранителот на титулата како да се разбуди кога беше најпотребно. Работнички Скопје ја стабилизира играта и во поле и на мрежа, а тоа резултираше со 22:25. Во продолжението притисокот премина на Јанта Волеј КВ, шампионот го намали и бројот на грешки и одново со 22:25, се избори за тај-брејк.
Во решавачкиот сет, Јанта Волеј КВ отвори со 4:1, односно 5:2, но Работнички Скопје експресно се врати на 5:5. Блокот на домашните проработе кога беше најпотребно и тие со 8:6 заминаа на промена на страните. Највисоката предност тимот на Јанта ја имаше на 10:7, но следуваше серија од 1-5 на Работнички Скопје за нов пресврт 11:12 во финишот на дуелот. Поен за поен се играше до 13:13, а потоа шампионот ја искористи првата сет-меч топка за победа и важни два гостински бода.
Работнички Скопје го предводеа Василевска и Дикова со по 17 поени, додека во редовите на Јанта Волеј КВ Бошковска со 19 поени и Собол со 12 поени беа најефикасни.
