На отворањето на пролетниот дел од сезоната шампионот Работнички Скопје го запиша вториот пораз во Првата женска лига, овојпат од Наковски Волеј, откако вечерва во „Борис Трајковски“ загуби со 0:3 (20:25, 18:25, 18:25).
Малата сала во „Борис Трајковски“ им одговара на струмичанки кои се први што го победија Работнички Скопје на домашен терен, па тие заедно со Јанта Волеј КВ се единствените два тима кои во досегашниот тек од сезоната може да се пофалат со победи над бранителот на титулата. Ако во средината на ноември минатата година Јанта Волеј КВ славеше со 3:1, сега Наковски Волеј стигна до максимална победа потврдувајќи дека овие три тима се главни кандидати за титулите сезонава.
Ривалите понудија добар меч, со голема борба, но во клучните моменти од сетовите Наковски Волеј делуваше како подисциплинирано и поконкретно во играта и во поле и на мрежа.
На натпреварите од втората фаза – 2 Вардар ЕМ со 3:0 ја победи Ускана Волеј, додека Струмица жени со 3:1 се радуваа против Младост УГД.
Првото коло ќе биде комплетирано в понеделник кога играат Јанта Волеј КВ и Фит Фан Волеј.
