Четири екипи Куманово, Македонија Макс, Универзитет во Тетово и Виктори Волеј преку бараж фазата ќе се борат за место во осминафиналето од Купот на ОФМ 2025 во женска конкуренција.
Според пропозициите екипите кои есенскиот дел од првенството го завршија на последните четири места во Втората женска лига ќе се соочат во баражот. Се игра во еден добиен натпревар на теренот на подобро пласираната екипа на табелата.
Поточно Универзитет во Тетово и Виктори Волеј се првата двојка, која вечерва од 19 часот игра во спортската сала „Млади“ на Тетовскиот универзитет. Вториот пар го сочинуваат Куманово и Македонија Макс, чии дуел е закажан за денеска во 21 часот во салата „Перо Наков“ во Куманово.
Победниците од овие два дуели ќе се соочат меѓусебно на 5 февруари, а подобриот од овој меч ќе обезбеди пласман во осминафиналето од Купот на ОФМ 2025 кај дамите.
Директен пласман во осминафиналето имаат обезбедено прволигашите Јанта Волеј КВ, Работнички Скопје, Наковски Волеј, Фит Фан Волеј, Вардар ЕМ, Младост УГД, Струмица жени, Ускана Волеј, како и второлигашите Газели Волеј, Пелистер Волеј, Бами Кор, Фламинго Волеј, Јанта Волеј БУТ, Вардар жени и Форца Волеј ЕМА.
