Во Тирана, во организација на Одбојкарската федерација на Албанија се одржа 26. Генерално собрание на Балканската одбојкарска асоцијација (БВА). На Собранието на кое учествуваа 10 од 11 земји – членки, претставници на Одбојкарската федерација на Македонија беа претседателот Петар Јовановски и генералниот секретар Филип Деспотовски.
Генералното собрание едногласно донесе одлука да и дозволи на Одбојкарската федерација Малта да учествува со репрезентации во натпреварувањата под капата на БВА.
На Собранието беа дефинирани летните првенства во одбојка и одбојка на песок со старосните ограничувања, а исто така се донесоа одлуки и за финансиските и натпреварувачки прашања. Сите учесници и организатори ќе бидат потврдени до крајот на февруари 2025 година.
Возрасни категории на настани за национални тимови во затворен тип на БВА 2025 година:
У21М – 1 јануари 2005 година и потоа
У21W – 1 јануари 2005 година и потоа
У19М – 1 јануари 2007 година и потоа
У19W – 1 јануари 2007 година и потоа
У16М – 1 јануари 2010 година и потоа
У16W – 1 јануари 2010 година и потоа
Членовите на Собранието едногласно одлучија канцеларијата на БВА од Истанбул да се пресели во Белград, Србија.
Според одлуката на Собранието, нов претседател на БВА ќе биде Милутин Поповиќ од Босна и Херцеговина, а нов потпретседател ќе биде Георгиос Карампецос од Грција.
Почесни гости на Собранието беа првиот човек на Европската одбојкарска конфедерација (ЦЕВ) Роко Шикириќ, првиот потпретседател на ЦЕВ Иван Кнежевиќ, како и директорот на ЦЕВ Вук Карановиќ, претседателот на Хрватската одбојкарска федерација и спортски директор на МЕВЗА, Фране Жаниќ, како и директорката на Хрватската одбојкарска федерација и претседателката на МЕВЗА, Валентина Бифлин.
Следното, 27. Генерално собрание на Асоцијацијата ќе се одржи во јануари 2026 година во Босна и Херцеговина.
