Во исклучително богатата одбојкарска програма кај нас во овие неколку дена влегува и Балканското првенство во одбојка на песок за играчи до 22 години. Одбојкарската федерација на Македонија го организира овој настан во соработка со Општина Ново Село, а на терените на спортскиот центар „Мануш Турновски“ се очекува да има атрактивни натпревари со учество на некои од најталентираните одбојкари и одбојкарки во овој спорт во регионот.
„Одбојката на песок е се поразвиен спорт со застапеност и на Олимпијадите. Ние секоја година се обидуваме да ја збогатиме нашата активност со организација на вакви турнири во рамки на Балканската одбојкарска асоцијација, а на тој начин да им овозможиме не само на љубителите на одбојката, туку и на сите спортски вљубеници да се запознаат со одбојката на песок. Тоа е еден начин да се поминат летните горештини со спортско-забавни содржини“, вели генералниот секретар на Одбојкарската федерација на Македонија Зоран Карановиќ.
На Балканското првенство во Ново Село е најавено учество на осум машки и на седум женски двојки од седум земји: Турција, Молдавија, Босна и Херцеговина, Грција, Косово, Романија и од кај нас. Македонија ќе ја претставуваат Кристијан Илијев и Филип Јованов во едната, како и Никола Георгиев и Филип Петрушевски во другата машка двојка, а кај дамите Симона Наковска и Стефанија Кипријановска. Првиот натпреварувачки ден е в петок со групните мечеви и со церемонијата на свечено отворање од 20 часот и 30 минути, в сабота исто така е планирано разигрувањето по групи, а в недела елиминациската фаза.
Балканско првенство во одбојка на песок (играчи родени 2003 и подоцна)
Групна фаза (09.08.2024 петок, 09.00 – 22.30)
Групна фаза (10.08.2024, сабота, 09.00 – 22.30)
Четвртфинале (11.08.2024, недела, 08.30 – 12.30)
Полуфинале, меч за бронза и финале (11.08,2024, недела, 16.30 – 20.30)
