Третиот натпревар во финалната серија од разигрувањето во машкото одбојкарско првенство на Македонија ќе донесе една од екипите на дофат на титулата. Струмица 47&72 денеска ќе игра на домашен терен со Штип УГД, а таа предност досега се покажа клучна затоа што секој го користеше настапот пред своја публика, па резултатот е 1-1 во низата до три триумфи. Рамноправно беше и во поглед на освоените и на загубените сетови, а тоа може да биде најава за уште еден неизвесен дуел, денеска од 19 часот во салата „Парк“ во Струмица.
Бранителот на ланскиот трон има позитива во меѓусебните пресметки сезонава, доби четири од шест, но предизвикувачот се радуваше во финалето на купот, го освои првиот пехар во клупската историја и се покажа сериозен ривал за неприкосновениот тим кај нас од 2012-та досега. Струмица во тој период освои девет шампионски и куп трофеи, а со оглед дека е прв првак во независна Македонија, во витрините има вкупно десет пехари за најдобар состав во првата македонска одбојкарска лига.
Преносот од денешниот натпревар во салата „Парк“ е од 19 часот на МРТ-3.
Финале (мажи) – до три добиени натпревари
Струмица 47&72 – Штип УГД 3:1 (25:19, 25:18, 23:25, 25:22)
Штип УГД – Струмица 47&72 3:1 (30:28, 17:25, 25:20, 25:21)
Струмица 47&72 – Штип УГД (понеделник 22.04.2024, МРТ-3, 19.00)
Штип УГД – Струмица 47&72 (четврток 25.04.2024)
Струмица 47&72 – Штип УГД (недела 28.04.2024)
