Актуелниот првак го оправда реномето во првиот натпревар од финалната серија во машкиот одбојкарски шампионат на Македонија. Струмица 47&72 триумфираше над Штип УГД со 3:1 (25:19, 25:18, 23:25, 25:22) за водство со 1-0 во низата што ќе трае додека една од екипите не стигне до три победи.
Во салата „Парк“ вечерва, струмичани, кои од 2012-та досега не беа на тронот само две сезони, отворија подобро, а на освојувачите на годинашниот куп, одбојкарите на Штип УГД, им беа потребни два сета за да почнат да го предизвикуваат противникот. Сепак, Струмица 47&72 го издржа притисокот и предводена од Хенкс со 16, Омхени со 13 и Милев со 12 поени успеа да ја задржи предноста на домашниот терен во финалето. Задмард со 14 и Абхар со 12 беа најефикасни кај Штип УГД кој ќе биде домаќин на втората пресметка в петок.
По денешниот натпревар, меѓусебниот биланс во лигата сезонава е 4-0 за фаворитот за титулата, а штипјани беа подобри во финалето на купот, па се радуваа на првиот пехар во клупската историја.
Финале (мажи) – до три добиени натпревари
Струмица 47&72 – Штип УГД 3:1 (25:19, 25:18, 23:25, 25:22)
Штип УГД – Струмица 47&72 (петок 19.04.2024)
Струмица 47&72 – Штип УГД (понеделник 22.04.2024)
Штип УГД – Струмица 47&72 (четврток 25.04.2024)
Струмица 47&72 – Штип УГД (недела 28.04.2024)
