Освојувачките на купот (Струмица жени) против бранителките на тронот (Работнички Скопје). Финалната серија за титулата во женскиот одбојкарски шампионат на Македонија ќе донесе уште едно соочување на двете екипи коишто ги освоија последните пехари во македонската одбојка.
Струмица жени имаше најдобар биланс во првенството, загуби само еднаш, токму од ривалките во финалето, но ги доби преостанатите три пресметки во есенскиот дел од сезоната и во втората фаза, а славеше и во полуфиналето на завршниот тунир од купот. Оттука, билансот во меѓусебните дуели е 4-1 за Струмица жени, а ниту еден дуел не заврши во три сета. Четирипати беше 3: 1, а еднаш 3:2 кога во купот во Штип, струмичанки направија пресврт по негативата од 2:0.
Составот на Гоце Кончалиев на своја страна ќе има уште една предност, а тоа е домашниот терен. Поради подобриот настап сезонава, претендентките за престолот ќе ја почнат финалната низа на домашен терен, а потоа ќе се игра наизменично во Скопје и во Струмица се додека еден од тимовите не оствари три победи. Тоа значи дека серијата ќе трае најмалку три, а најмногу пет натпревари. Првиот е закажан за денеска од 17 часот, со пренос на МРТ-3.
Финале (жени) – до три добиени натпревари
Струмица жени – Работнички Скопје (недела 14.04.2024)
Работнички Скопје – Струмица жени (среда 17.04.2024)
Струмица жени – Работнички Скопје (сабота 20.04.2024)
Работнички Скопје – Струмица жени (вторник 23.04.2024)
Струмица жени – Работнички Скопје (петок 26.04.2024)
