Полуфиналето во македонското одбојкарско првенство содржи уште еден натпревар, а тоа е мајсторката во серијата на Работнички 71&22 и Штип УГД. По првите две пресметки резултатот е нерешен, секој славеше на домашен терен, па поуспешниот од денешниот дуел ќе биде противник на Струмица 47&72 во финалната низа. Актуелниот првак го елиминираше Универзитет во Тетово по две средби, а според очекувањата, неизвесност донесе соочувањето на скопскиот и на штипскиот тим. Работнички 71&22 е поуспешен во меѓусебните дуели сезонава (4-2), во основниот тек беше 3-0 во победи за него, но Штип УГД славеше во полуфиналето на купот, а потоа и го освои престижниот пехар, така што сите опции се отворени, особено кога решава еден натпревар. Одбојкарските возбудувања од салата „Независна Македонија“ во ОУ Невена Георгиева – Дуња можете да ги следите во пренос на МРТ-3 од 19 часот и 55 минути.
Кај дамите полуфиналето заврши во два натпревара во коишто Струмица жени ја потврди фаворитската улога против Наковски волеј, а Работнички Скопје го совлада тимот на Јанта волеј. Во елиминациската фаза во македонската одбојка спаѓаше и бараж двомечот на Вардар ЕМ и на Газели волеј за влез во Првата лига следната сезона. Вардарки славеа двапати и го задржаа статусот во елитата.
Прва лига (мажи), полуфинале
Струмица 47&72 – Универзитет во Тетово (2-0)
Работнички 71&22 – Штип УГД (1-1)
***Финале (мажи): Струмица 47&72 – Работнички 71&22 / Штип УГД
Прва лига (жени), полуфинале
Струмица жени – Наковски волеј (0-2)
Работнички Скопје – Јанта волеј (2-0)
***Финале (жени): Струмица жени – Работнички Скопје
