Одбојкарската федерација на Македонија го финализираше проектот „Финансиска и бизнис писменост на спортисти и на тренери“ во соработка со Олимпискиот комитет на Словенија, а поддржан од Европската комисија. Во изминатите 18 месеци, македонската куќа на одбојката соработуваше со олимписките комитети на Србија, на Австрија и на Литванија, како и со Европската Олимписка Академија, а завршница на проектот беа работилниците одржани во струмичко Ново село на 27-ми декември.
Вкупно 69-мина учесници имаа можност да ги следат предавањата на финансискиот советник за спортисти Миха Урек, на тема како да се управува со паричните средства во текот или по завршувањето на спортската кариера, а со тоа и како да се сочува интегритетот на спортот од обидите да се заработи на неморален начин.
„Спортистот секогаш треба да биде свесен дека остварувањето надвор од теренот е подеднакво важно како остварувањето на теренот“, со овие зборови поранешниот ракометар ја почнуваше едукацијата за вкупно 69-мина учесници на работилниците. Во интеракција со нив, експертот за финансиска стабилност на спортистите ги посочи примерите на неколкумина познати спортисти во Словенија коишто се соочиле со парични проблеми поради лоши инвестиции или несоодветен животен стил, меѓу нив и Примож Козмус – олимписки и светски првак во кладиво и Рашо Нестеровиќ – кошаркар во НБА и освојувач на Евролигата. Урек го посочи и искуството на Борис Бекер, кој иако важи за еден од најдобрите тенисери на сите времиња, беше принуден да прогласи банкрот. Токму затоа, финансискиот советник за спортисти на учесниците на работилницата им зборуваше за победничкиот менталитет, за тоа како да се живее стабилен живот надвор од теренот во екот на најголеми успеси на теренот, за животниот стил генерално, за личните финансии и за преодот од активен спортист во спортски пензионер.
„Задоволство ми е што бев во Македонија и што имав можност да предавам на спортисти од различна возраст. Особена радост ми е што на последната работилница присуствуваа млади спортисти коишто веројатно првпат слушнаа за овие теми и досега воопшто не размислувале за нив. Ова за мене беше прекрасно искуство, се надевам дека чувството е двострано“, изјави Миха Урек, автор на книгата „Победнички менталитет“.
„Секое учество во вакви проекти и соработка од којашто може да се има само позитивни ефекти, нам ни значи многу. Претходно го имавме проектот за двојни кариери на спортистите, а сега и овие исклучително значајни теми во врска со менаџирање на финансиските средства и интегритетот на спортот. Сакам да му се заблагодарам на нашиот соработник господинот Алеш Шолар од Олимпискиот комитет на Словенија, кој не нè заборава и во минатите четири години ни нуди ваков тип соработки“, истакна генералниот секретар на ОФМ Зоран Карановиќ.
