Иако утре нема вонредно коло, спортската среда во Македонија ќе има силна одбојкарска нишка. Двата одложени натпревара во сениорските конкуренции го носат епитетот дерби затоа што ќе играат две од трите најдобри екипи на табелата досега.
Во Првата лига (мажи) Штип УГД ќе ја пречека Струмица 47&72 со надеж дека пред своја публика ќе биде достоен ривал за бранителот на ланската двојна круна и за најдобриот македонски тим во минатата деценија. Штипјани досега забележаа седум победи на осум натпревари и во оваа сезона најавуваат дека не само што ќе играат во Втората фаза-1 напролет, туку дека ќе остават силна трага во трката за највисок пласман. Актуелниот првак немаше кикс, ги доби сите осум меча, а по завршувањето на европската авантура, целосно ќе биде посветен на домашната сцена, а тоа можеби ќе го стави домашниот состав во потешка ситуација во однос на претходните противници на шампионот.
Кај дамите, Јанта волеј ќе сервира против Струмица жени со полна самодоверба по вчерашниот успех во дербито со Наковски волеј на гостински терен. Со таа победа, вицепрвенките имаат биланс 8-2 и се доближија на само еден чекор до Наковски волеј, но за два триумфа заостануваат од Струмица жени. Тоа значи дека водечките на табелата утре во Скопје може да играат растоварено знаејќи дека без разлика на резултатот, секако ќе ја задржат првата позиција. Струмица жени досега не згреши ниту еднаш и со максимално остварување најави дека сезонава сериозно конкурира за пехар.
Прва лига (мажи), 8-мо коло
Штип УГД – Струмица 47&72 (6-ти декември, среда, 19.00)
Табела: Струмица 8-0, Лирија 7-2, Штип УГД 7-1, Весна Пробиштип 6-3, Шкендија 5-4, Работнички 5-3, Универзитет во Тетово 5-4, ГОК Борец 4-5, Јанта волеј 2-6, Сушево 2-7, Вардар 1-8, Македонија Џио 0-9.
Прва лига (жени), 10-то коло
Јанта волеј – Струмица жени (6-ти декември, среда, 20.00)
Табела: Струмица жени 10-0, Наковски волеј 9-2, Јанта волеј 8-2, Работнички Скопје 6-5, Фит фан волеј 4-7, Младост УГД 4-7, Вардар ЕМ 2-9, Вардар жени 0-11.
