По две недели тренинзи за настапот на Европското првенство во Скопје од 30-ти август до 6-ти септември, македонските одбојкари добија два дена одмор од селекторот Јошко Миленкоски. Темпото беше силно, репрезентативците работеа напорно на физичка подготовка, а постепено влегуваа и во техничкиот и во тактичкиот сегмент пред првите пријателски натпревари со Романија, па потребно е да се релаксираат пред периодот кога ќе ја добиваат вистинската форма за нашето трето учество на континенталните самити.
оради повреда на рамото, коректорот Стефан Алексов заврши со подготовките, така што од среда Миленкоски ќе користи 18-мина одбојкари, а штом ќе завршат контролите со Романците ќе има дополнително кратење на националниот состав за уште двајца. Иако беа планирани три контролни средби, Македонија и Романија ќе одиграат две затоа што противникот реши да замине од Скопје ден порано од предвиденото, па првиот тест ќе биде од затворен карактер в петок вечер, а за сабота е предвиден официјалниот контролен натпревар во арената „Јане Сандански“. До Европското првенство и дуелите со Данска, со Црна Гора, со Полска, Холандија и со Чешка во „Борис Трајковски“, македонскиот одбојкарски тим ќе одигра уште осум пријателски, четири со Јапонија, две со Израел и по една со Грција и со Египет.
Целта на црвено-жолтите е да изборат прво осминафинале во третото појавување на континенталните шампионати, а за да ги остварат соништата потребна им е силна поддршка од трибините. Затоа, купете билети за ЕП на https://tickets.cev.eu/cev-eurovolley-2023-men и навивајте за македонските одбојкари на првото машко сениорско европско првенство во историјата на независна Македонија.
