Полска и Италија се светски одбојкарски велесили, а македонските одбојкари ќе ја имаат честа да играат со поранешниот, а да се надеваат на дуел со актуелниот светски првак. Како коорганизатор на претстојното Европско првенство, Македонија имаше среќа во групата „Це“ да ги добие Полјаците како носители, а тоа значи дека во периодот од 30-ти август до 6-ти септември, нашата публика ќе може да го гледа трикратниот светски првак, репрезентацијата којашто освои два од последните три Мундијали, а има златни медали и на Олимпијадите и на континенталните шампионати.
Полска игра одлично и во годинашната Лига на нации, стигна до полуфинале со Јапонија откако славеше над Бразил со 3:0 (26:24, 25:21, 25:20). Курек, Леон, Качмарек, Биенек, Шливка, Кохановски, Заторски и другите ѕвезди коишто ќе играат во Скопје, предводени од српскиот стратег Никола Грбиќ, не му дадоа можност за надеж на бразилскиот тим, а тоа доволно илустрира каков противник ќе има Македонија во арената „Борис Трајковски“ на 3-ти септември. Нашата цел е да играме осминафинале, а тоа значи дека треба да ја минеме групата со Данска, со Црна Гора, со Холандија и со Чешка, се разбира и со Полска. Во таков случај многу веројатно е да се сретнеме со Италија која е актуелен светски и европски шампион. Како и Полјаците, „аѕурите“ играат одлично во Лигата на нации, во четвртфиналето на завршниот турнир ја прегазија Аргентина со 3:0 (25:17, 25:13, 25:14), па ќе одат на Американците во следниот натпреварувачки круг.
