Ден по двојната програма во Европската лига, македонската одбојка може да биде задоволна со победата на одбојкарите над Белгија и со 59-те поени на одбојкарките против Летонија.
За машката репрезентација, трите бода во пресметката со реномираниот белгиски состав значат многу од аспект на тоа дека првото учество во златниот квалитативен сегмент од континенталното натпреварување нема да биде ревијално, туку, напротив, се отвора можност Македонија да влезе во математички пресметки за висок пласман во групата „Бе“. По две кола, националниот тим има половичен биланс 1-1 и поради полош сет-количник од вчерашниот противник, се наоѓа на третото место на табелата. Но работите може да се променат веќе в сабота кога во „Борис Трајковски“ ќе гостува Хрватска, која ги загуби двата досегашни меча. Украинците се први, двапати се радуваа без загубен сет, па во Белгија за два дена може да направат голем исчекор кон првото место, а со тоа го најават учеството на завршниот турнир во Задар. Како домаќини, Хрватите секако ќе бидат таму без оглед на пласманот во групата, а доколку се наместат коцките, ние би можеле да ја збогатиме трката и да ја одржуваме неизвесноста, макар што основна определба на селекторот Јошко Миленкоски е да градиме игра за Европското првенство годинава, како најголем настан којшто се одржал кај нас во кој било спорт, а да е со наше учество.
Главно исто размислуваат и нашите противници во групата на еврошампионатот во август и во септември, но и тие победуваат. Данска ја совлада Романија со 3-0, а Чешка беше поуспешна од Финска во пет сета, па Данците се трети во групата „А“, а Чесите први во групата „Це“.
