По десетдневна интензивна физичка подготовка, машката репрезентација до 20 години влегува во втората фаза од темпирањето на формата во Крушево, за Зонските квалификации за ЕП 2027, односно започнува со воигрување на тимот.
Селекторот Јован Шапе и неговиот асистент Миодраг Новески работат во одлична атмосфера.
„Засега подготовките течат според договореното. Во првиот дел одработивме физичка и техничка подготовка и се помина во најдобар ред. Добија момците ден ипол за одмор и од вчера почнавме со воигрување на поставата. Поголем дел од играчите беа и во екипата која настапи на ЕМОФ во Скопје лани и познат им е системот. Времето кое го имаме ќе го искористиме максимално за што подобра тактичка подготовка“, коментира селекторот Шапе.
Младинците ќе имаат силна конкуренција во Зонските квалификации кои од 25 до 29 август се играат во Софија, а каде покрај домаќинот Бугарија, ќе се соочат и со Србија, Турција, Русија и Белорусија.
