Женската репрезентација на Македонија имаше скромен настап во Европската лига 2026, кој го заврши со шест порази во исто толку натпревари. Последните два дуели, македонските репрезентативки ги загубија од Хрватска, односно Словенија, пред својата публика во СЦ „Борис Трајковски“ во Скопје.
Македонија е на последното, 24. место во генералниот пласман по комплетирањето на првата фаза од квалификациите за Европското првенство 2028, со нула бодови, и е во друштво на Грузија, Албанија и Исланд, кои имаат подобар сет или поен количник од нас.
Словенија ја потврди улогата на фаворит во Скопје и таа е единствената репрезентација која лига рундата ја заврши без пораз и без загубен сет откако со 3:0 (25:15, 25:10, 25:10) ја победи Македонија. Македонските одбојкарки посилен отпор понудија единствено во првиот сет кога имаа и водство од 12:10, но Словенија со серија направи пресврт, а потоа и убедливо го освои сетот. Во продолжението Словенките рутински си ја завршија работата и како првопласирани на табелата ќе играат во полуфиналето. Ана Фасулева со седум поени и Андротеа Милевска со шест беа најефикасни во нашите редови.
Претходно, на отворањето на турнирот Македонија загуби и од Хрватска, 3:0 (25:15, 25:12, 25:15) во меч во кој Андрота Милевска постигна седум поени, Љиља Ковачевиќ и Мила Дикова имаа по пет поени, додека Ива Стојкоска и Ана Фасулева по четири поени.
Дамите имаат одмор до 27 јули за кога во Скопје е закажан нов собир за подготовските за учеството на Медитеранските игри 2026 во Таранто, Италија.
