Машката сениорска репрезентација на Македонија, денеска (19 часот) во СС „Парк“ во Струмица против Холандија го отвора новото издание од Европската лига 2026.
Статистиката не е на наша страна ако се погледнат меѓусебните дуели кои ги имаме со овој национален тим. Досега имаме одиграно четири натпревари, од кои Холандија има три максимални победи, додека Македонија еднаш се радувала со тај-брејк.
Меѓусебниот дуел од 3-1 за „лалињата“ доаѓа од двете соочувања на континенталните собири, ЕП 2023 во Скопје и ЕП 2021 во Темпере во натпреварите од групната фаза, додека претходно се имаме сретнато во далечната 2010 година во квалификациите за ЕП 2011 кога Холандија славеше со 3:0 на домашен терен, додека Македонија победи со 3:2 пред својата публика, што е и единствен триумф над оваа селекција.
Избраниците на селекторот Јошко Миленкоски ќе се обидат да ја сменат традицијата вечерва и да ја израдуваат јавноста на стартот на Европската лига 2026.
