Женската сениорска репрезентација на Македонија, очекувано, загуби од Грција со 0:3 (8:25, 11:25, 19:25) во претпоследниот натпревар од евро-квалификацискиот циклус. Македонските одбојкарки резултатски немаа што да загубат во овој дуел затоа што тие од претходно останаа без шанси за учество на континенталниот собир.
Желбите и целта беше тимот да се претстави во што подобро светло, особено во последниот натпревар летово пред својата публика, но за жал избраничките на селекторот Стефан Пауновиќ соодветен отпор понудија само во еден сет.
Грција која веќе има обезбеден пласман на ЕуроВолеј 2026 беше пресилен ривал, доминираше на теренот во комплетниот натпревар предводена од Тикманиду со 14 поени и Бака до 12 поени.
Македонија како да изгоре во желбата, премногу сакаа дамите, но понудија многу малку од своите реални можности особено во првите два сета. Голем број на технички грешки, проблеми со приемот и играта во полето, а не најдоа решение и за одличниот блок на противникот на мрежата (вкупно 12).
Единствено во третиот сет имаа нашите девојки убаво отворање со водство од 3:0, односно 6:3. Грција изедначи на 6:6, но рамноправната игра поен за поен продолжи. Се „разбуди“ и блокот, ги консолидиравме редовите и иако Грција имаше водство од 10:12, со серија од 7-0 Македонија дојде до највисоко водство од 17:12. Фаворитот со два тајм-аути во серија и две промени во составот ја врати контролата над резултатот и стигна до победа во три сета.
Во македонската репрезентација Теа Терзиевска беше најефикасна со 12 поени, додека Ива Стојкоска и Мери Бошковска имаа по четири поени, додека Тамара Стојанова и Лиља Ковачевиќ освоија по три.
Македонија последниот натпревар од квалификацискиот циклус за Европското првенство 2026 го игра на 9 август во Хартберг против Австрија.
