Машкиот шампион на Македонија, Струмица 47&72 ќе се соочи со романскиот првак Динамо Букурешт во првата рунда во ЦЕВ Лигата на шампионите. На денешната ждрепка во Луксембург струмичани го добија најтрофејниот романски клуб за нивни ривал на стартот на новата елитна сезона.
Првиот натпревар Струмица го игра на домашен терен, 21/23 октомври, додека реваншот е една седмица подоцна во Букурешт (28/30 октомври). Победникот од овој двомеч ќе обезбеди пласман во втората рунда, заедно со останатите победници од оваа фаза. Поразениот тим, пак, продолжува со настап на европска сцена, но во првото коло од ЦЕВ купот, каде за противник ќе го има тимот на Јухострој Чешке Будејовице од Чешка. Овој двомеч се игра во периодот од 11/13 ноември (дома), односно 18/20 ноември (на гости).
Женскиот првак Јанта Волеј Кисела Вода, пак, во најелитното европско клупско натпреварување ќе дебитира во втората рунда, каде на денешната ждрепка за противник го доби претставникот на БиХ, Гацко. Со трикратниот шампион во низа на БиХ, тимот на Јанта ќе игра во термините – 21/23 октомври пред домашната публика, односно на гости во Гацка 28/30 октомври.
Доколку обезбедат пласман во 3. рунда одбојкарките на македонскиот шампион ќе се соочат со француски Волеро. Во случај на пораз во двомечот во ЛШ, Јанта Волеј КВ ќе продолжи во првата рунда од ЦЕВ купот, каде за ривал го има составот на швајцарски Витеос Ношател. Овие натпревари се играат во средината на ноември.
