Младинките на Јанта Волеј Кисела Вода се новиот шампион во женска младинска конкуренција откако на финалниот турнир во салата „Јане Сандански“ во Скопје, во финалето со пресврт и во пет сета 3:2 (22:25, 22:25, 25:20, 26:24, 15:8) го совладаа бранителот на титулата Наковски Волеј.
Струмичкиот тим имаше одличен старт на мечот, каде и покрај големиот отпор на тимот на Јанта стигна до предност од 2:0 во сетови. Противникот се врати во третиот сет и намали на 2:1. Во четвртиот сет Наковски Волеј имаше водство од 21:19 и се чинеше дека работите одат во негова корист, но скопскиот состав не мислеше така. Изедначи на 21:21, а потоа не му дозволи на ривалот да ја искористи сет-меч топката на 23:24, туку се врати и со 26:24 го однесе натпреварот во тај-брејк. Одбојкарките на Јанта Волеј КВ знаеја што сакаат во решавачкиот сет и предводени од капитенот Мери Бошковска со комплетен кам-бек стигнаа до шампионската титула кај младинките.
Како вистинска увертира за финалето беше и дуелот за бронзениот медал, кој исто така беше решен по голема борба во пет сета, каде Работнички Скопје со 3:2 (20:25, 25:15, 25:15, 18:25, 15:9) ги победи Газели Волеј.
Ф4 ТУРНИР МЛАДИНКИ
ПОЛУФИНАЛЕ
Јанта Волеј КВ – Работнички Скопје 3:1 (25:22, 25:19, 22:25, 25:12)
Наковски Волеј – Газели Волеј 3:0 (25:20, 25:17, 25:16)
МЕЧ ЗА 3. МЕСТО
Работнички Скопје – Газели Волеј 3:2 (20:25, 25:15, 25:15, 18:25, 15:9)
ФИНАЛЕ
Јанта Волеј КВ – Наковски Волеј 3:2 (22:25, 22:25, 25:20, 26:24, 15:8)
КОНЕЧЕН ПЛАСМАН
1. Јанта Волеј КВ
2. Наковски Волеј
3. Работнички Скопје
4. Газели Волеј
