Важна победа остварија одбојкарките на Јанта Волеј КВ од 1:3 (27:25, 13:25, 17:25, 18:25) над Работнички Скопје во вториот натпревар од битката за шампионската титула кај дамите и со тоа имаат предност од 2:0 во финалната серија.
„Брејкот“ во „Борис Трајковски“ значи дека екипата на Никола Јаневиќ е на дофат до шампионската титула, но имаат да одиграат уште еден натпревар, третиот од серијата закажан за в петок, од 19:30 часот, пред нивната публика, во салата „Независна Македонија“ во Скопје.
За разлика од првиот финален меч во кој ривалите имаа големи осцилации во играта, овој натпревар Јанта Волеј предводен од одлично расположената Мери Бошковска со 23 поени, беше константен како во играта во поле, така и на мрежата. Делуваа гостинските помирни и поконцентрирани и како точно да знаеја што сакаат од овој дуел.
Работнички Скопје единствено во првиот сет беше на ниво, особено во финишот, кога играта поен за поен, ја претвори во водство од 27:25, односно 1:0.
Во следните три сета уште во раната фаза одбојкарките на Душко Деспотовски остануваа без конкретен одговор за противникот, постојано беа во ситуација да бркаат резултат, а дополнително работата им ја отежнуваа и многуте технички грешки.
Јанта Волеј го сврте резултатот во своја полза 1:2. Во средината на четвртиот сет Работнички Скопје се закани 16:16 и за момент се доби впечаток дека и овој дуел ќе се решава во тај-брејк, но гостинските одбојкарки не го дозволија тоа. Покрај Бошковска одлична беше и Ана Георгиевска со 11 поени.
Кај Работнички Скопје Стакхаус со 11 и Василевска со 9 поени беа најефикасни.
