Ако се суди според реномето, финалната серија во разигрувањето кај одбојкарите треба да има само една насока. Но Штип УГД ја игра најдобрата сезона во македонската одбојка, така што Струмица 47&72 треба добро да се потруди за да ја оправда фаворитската улога во серијата што ќе трае најмалку три, а најмногу пет натпревари. Во неа, штипската екипа ќе се обиде да го детронизира струмичкиот соатав којшто од 2012-та досега, само двапати не беше шампион на Македонија.
Тимот на Штип УГД веќе направи едно големо изненадување, а тоа е триумфот во купот, во финалето токму против ривалот во разигрувањето и за првенствената титула. Но задачата сега ќе биде потешка затоа што за целосна победа треба да се слави на три натпревари, а не на еден. Но фактот што предизвикувачот веќе освои еден пехар, треба да значи настап без оптоварување, за разлика од Струмица 47&72, која без оглед на предноста на домашниот терен во финалната низа, ќе го има притисокот на своја страна.
Првиот натпревар е закажан за денеска во салата „Парк“, а преносот е на МРТ-3 од 19 часот и 25 минути.
Финале (мажи) – до три добиени натпревари
Струмица 47&72 – Штип УГД (вторник 16.04.2024)
Штип УГД – Струмица 47&72 (петок 19.04.2024)
Струмица 47&72 – Штип УГД (понеделник 22.04.2024)
Штип УГД – Струмица 47&72 (четврток 25.04.2024)
Струмица 47&72 – Штип УГД (недела 28.04.2024)
