Порано од вообичаено, одбојкарите прволигаши и одбојкарките од второлигашката конкуренција од денеска се враќаат на терените за продолжувањето на клупската 2023/24-та. Во првата машка лига, најдобрите шест екипи ја формираа Втората фаза-1 во којашто ќе бидат одиграни десет кола според принципот секој со секого дома и на гости, а потоа ќе почне полуфиналето од разигрувањето. Во првото коло од овој натпреварувачки сегмент, бранителот на двојната круна Струмица 47&72 ќе го пречека составот на Весна Пробиштип со надеж дека ќе го задржи максималниот ефект досега. Штип УГД утре ќе сервира со Универзитет во Тетово, а Лирија со Работнички 71&22. Резултатите од есенскиот дел се важат, така што идентични се пласманот и билансот пред овие три средби.
Во Втората фаза-2, исто така има шест екипи, што значи дека ќе бидат одиграни вкупно десет кола, а потоа ќе биде одреден конечниот распоред за сезоната од 7-то до 12-то место. Шкендија ќе го продолжи натпреварувањето со најголем број победи досега (5), а зад неа се ГОК Борец (4), Сушево (3), Јанта волеј (2), Вардар (1) и Македонија Џио без триумф.
Во овој дел од лигата, кај дамите има по четири тима, така што во пресрет на разигувањето ќе има шест кола, па Втората фаза во елитното друштво ќе почне на 17-ти овој месец. Затоа, пак, второлигашите ќе истрчаат на теренот со натпреварите со 10-то коло. На половина од сезоната, Пелистер волеј и Газели волеј се во најтесна трка за првото место коешто носи виза за повисок ранг, а според правилата, второпласираниот ќе игра бараж со седмата екипа од прволигашкото натпреварување.
Прва лига (мажи), Втора фаза-1, 1-во коло
Струмица 47&72 – Весна Пробиштип (петок, 17.00)
Штип УГД – Универзитет во Тетово (сабота, 17.00)
Лирија – Работнички 71&22 (сабота, 16.30)
Табела: Струмица 11-0, Штип УГД 9-2, Лирија 9-2, Работнички 8-3, Универзитет во Тетово 7-4, Весна Пробиштип 7-4.
Прва лига (мажи), Втора фаза-2, 1-во коло
Сушево – Јанта волеј (петок, 20.00)
Шкендија – Македонија Џио (сабота, 18.00)
ГОК Борец – Вардар (сабота, 18.00)
Табела: Шкендија 5-6, ГОК Борец 4-7, Сушево 3-8, Јанта волеј 2-9, Вардар 1-10, Македонија Џио 0-11.
Втора лига (жени), 10-то коло
Пелистер волеј – Фламинго волеј (петок, 19.00)
Куманово – Газели волеј (сабота, 12.30)
Форца волеј Ема – Универзитет во Тетово (сабота, 13.00)
Виктори волеј – Бами Кор (сабота, 15.00)
Македонија Макс – Ускана (сабота, 14.00)
Табела: Пелистер волеј 8-1, Газели волеј 8-1, Ускана 7-2, Бами Кор 7-2, Фламинго волеј 5-4, Виктори волеј 4-5, Форца волеј Ема 3-6, Куманово 2-7, Македонија Макс 1-8, Универзитет во Тетово 0-9.
