Денеска еден тренинг, кино вечер, а од утре почеток на пријателските натпревари како главна подготовка за Европското првенство чијшто коорганизатор ќе биде Македонија во периодот од 30-ти август до 6-ти септември. Романската репрезентација, којашто лани ја освои Европската сребрена лига, а исто така ја гради формата за настапот на континенталниот собир, денеска ќе пристигне во Скопје, но ќе замине ден порано, па наместо планираните три ќе одиграме два натпревара. Првиот е утре од 19 часот во „Јане Сандански“ и ќе биде од затворен карактер, додека пак, саботниот, на истото место и во истото време, ќе биде отворен за публика и ќе се игра како да е официјален.
А пред тоа, македонските одбојкари вечерва заеднички ќе го гледаат документарниот филм „Живеејќи го сонот“ којшто е дело на МРТ, долгогодишниот медиумски партнер на Одбојкарската федерација на Македонија. Во час и половина авторите ќе го одбележат нерамниот пат на македонските одбојкари до конечното задоволство, а тоа е третото учество на европските првенства едноподруго, сега на домашен терен, Тоа е спортски настан со најголем ранг во независна Македонија затоа што е прв машки сениорски континентален собир. Премиерата е на МТВ-1 од 20 часот и 15 минути.
