Пораз во три сета, а чувство дека македонските одбојкари можеа многу повеќе на гостувањето во Шарлоа во четвриот настап во Европската златна лига. Белгија ни го нанесе вториот пораз, а резултатот на разлика (27:25, 25:23, 26:24) најдобро покажува дека Македонија лесно можеше да игра и на победа. Тоа го покажуваат и статистичките параметри во неколку категории. Процентот на ефикасност во напад, приемот, грешките, поените од контри се речиси израмнети, а противникот подобро се снаоѓаше на негативен прием.
Капитенот Никола Ѓорѓиев имаше 17 поени од 35 топки за него, Љафтов оствари пет од вкупно шест аса за нас, додека, пак, во нападот доби 14 топки од коишто погоди шест. Најефикасните белгиски играчи имаа повисок процент, примачот Десмет 17 од 25, а коректорот Кокс, кој беше резервист во Скопје, искористи 15 од 25 акции. Нашите центри беа подобри од белгиските, Савовски блокираше четирипати, а во напад поентираше петпати од шест додавања, идентично како и Маџунков, кој фати еден блок за вкупно шест поени. Но противничкиот селектор, Италијанецот Емануеле Ѕанини, како и на првиот дуел во „Борис Трајковски“ кога победивме со 3-1, можеше да смета на повеќе кадровски опции за да го менува текот на настаните на теренот, па иако Македонија имаше две сет-топки за 1-0, водство 16:14 во вториот сет, а 24:22 во третиот, значи две топки за да намали на 2-1, Белгија славеше со нереални 3-0 и го презеде второто место на табелата.
Во четвртото коло денеска ќе играат Хрватска и Украина, која води со максимален биланс, а домаќинот на завршниот турнир е последен, без триумф и без бод досега. Македонија е третопласирана, со забелешка дека доколку се радува во Задар против Хрватска в среда, може да исчекори, под претпоставка Украинците да ја потврдат својата доминација и на претстојната средба. Тие ќе ни бидат гости наредната недела во последниот натпревар од Европската златна лига којашто за нас е подготовка за Европското првенство во август и во септември. Тогаш пред домашна публика, македонските одбојкари ќе играат за нова резултатска граница, а тоа е прво осминафинале во нашето трето учество на континенталните собири. Се е подредено на таа цел.
