Македонските одбојкари ја совладаа Хрватска, повторно во пет сета, како што беше и на последните два дуела во полуфиналето на Европската лига во 2018-та и во 2021-ва. Но сега во групната фаза од златниот сегмент на континенталното натпреварување на ЦЕВ, а со тоа се пробија на второто место на табелата зад неприкосновената Украина.
Нашиот национален состав ја прифати фаворитската улога и беше убедлив во првиот сет со 25:17. Во вториот противникот многу грешеше, па откако завршивме со 25:22 за водство со 2-0, се чинеше дека Македонија може да оствари максимална победа, Но противничкиот селектор ја промени дијагоналата техничар-коректор, Хрватска заигра подобро иако не успеа да го стабилизира сервисот и израмни на 2-2 добивајќи го третиот сет со 25:22, а четвртиот со 31:29 без оглед што македонскиот национален состав имаше три меч-топки. Во решавачкиот, повторно беше драматично, но Македонија го врати нападот и со 16:14 се израдува на втората победа во Европската златна лига. Никола Ѓоргиев освои 30 поени, Љафтов заработи 18, Милев 8, Савовски 7, Маџунков продуцираше 5, а по еден Костиќ и Ѓорѓи Ѓорѓиев. Кај Хрватска, најдалеку отиде Марелиќ со 27 поени, а Зељковиќ и резервистот Митрашиновиќ остварија по 18.
Наредните два натпревара Македонија ќе ги одигра на гости во Белгија и во Хрватска, а на 18-ти овој месец ќе бидеме домаќини на Украина во последниот настап во групната фаза.
