Двајца претставници има македонската одбојка меѓу официјалните лица на Европското првенство У18 за жени, кое од вчера па до 12 јули ќе се одржува во Литванија и Летонија – делегатот Симон Џинес и интернационалната судијка Елеонора Петровска.
Џинес и Петровска се дел од официјалните лица во групата два во литванскиот град Шијаулиаи. Џинес е технички делегат на ЦЕВ на сите натпревари и за него ова е второ континентално натпреварување во млади категории низа со оваа функција, и ќе биде загревање пред Европското првенство во сениорска конкуренција во септември, кога ќе биде во Клуж, Романија.
Петровска, пак, за првпат дели правда на едно Европско првенство и веќе ја имаше првата задача, како втор судија на еден од најинтересните натпревари од првото коло во групата два меѓу Германија и Бугарија, кој се играше во пет сета (3:2). Денеска македонската судијка ќе биде главен арбитер на дуелот меѓу Финска и Франција.
На ЕП У18 се натпреваруваат 16 репрезентации (две групи по осум екипи) од кои првите две селекции од секоја група се соочуваат во полуфиналето, додека финалето се игра на 12 јули во Рига.
