Потребен е сосем поинаков пристап против Швајцарија

Вториот натпревар во ЦЕВ Европската Сребрена лига 2025 женската репрезентација на Македонија го игра вечерва, 20 часот, кога во салата „Парк“ во Струмица ќе ја пречека Швајцарија.

По стартната победа над Луксембург секако желбите се да се држи победничкиот ритам. Швајцарија е сериозен ривал против кој ќе биде потешко да се игра, но репрезентативките во неколку наврати повторија дека се подготвени за предизвикот.

„Имавме старт во Сребрената лига каков што посакувавме. Среќни сме за успехот и историската победа, но остануваме цврсто на земја. Како екипа си имаме поставено цел, а победата над Луксембург беше само првиот чекор. Веќе мислиме на Швајцарија, која е многу поквалитетен ривал од првиот. Во дуелот со нив мора да влеземе со сосем поинаков пристап во играта. Тактиката нема да ја откриваме (се смее) ама ќе дадеме се од себе за одново да ја израдуваме публиката и нацијата“, вели најефикасниот играч на првиот меч со Луксембург, Теа Терзиевска.

Слично размислува и Тамара Стојанова.

„Пресреќна сум што конечно ја прекинавме негативната серија. После четири години по враќањето на сениорската репрезентација на европска сцена,  конечно го почувствувавме вкусот на победата. Работевме напорно, се боревме за секоја топка и заслужено победивме. Иако го започнавме натпреварот во грч, како што поминуваа поените ја покажавме нашата игра. Благодарам на публиката за поддршката и се надевам дека ќе дојдат и денеска да навиваат за нас, затоа што не очекува многу посериозен противник. Репрезентацијата на Швајцарија е фаворит за освојување на Сребрената лига, што ни претставува дополнителна мотивација и желба за надигрување“, додава Стојанова.

Селекторот Стефан Пауновиќ нема да прави измени во составот за вториот натпревар со Швајцарија, односно ќе се потпре на истите 14 девојки од првиот дуел со Луксембург.