Втора година во низа, Штип УГД е освојувач на Купот на ОФМ, откако во финалето од изданието за 2025 година со 3:0 (25:21, 26:24, 25:21) се радуваше над Струмица. Во одлична атмосфера во полната сала „25. Мај“ во Радовиш штипскиот состав ја оправда улогата на фаворит и го задржа пехарот во своите витрини уште една година.
Немаа лесна задача одбојкарите на Кристијан Ристески, со оглед на тоа дека Струмица беше силно мотивирана. Сите сетови се играа рамноправно, со голема борба на двете страни и атрактивни поени. Истовремено имаше и многу технички грешки и на двете страни, пред се на сервис. На крајот одлучи она што е карактеристика за куп натпреварувањето, моменталната инспирација.
Штип УГД го предводеше организаторот на играта, Давид Стојанов, кој беше прогласен за најкорисен играч на завршницата на Купот на ОФМ 2025.
