Битката за куп-трофејот во женска конкуренција во Купот на ОФМ 2025 ќе ја водат екипите на Наковски Волеј и Јанта Волеј Кисела Вода.
Наковски Волеј во првото полуфинале на завршниот турнир, кој се игра во салата „25. Мај“ во Радовиш со 3:0 (25:14, 25:21, 25:18) го победи тимот на Фит Фан Волеј. Составот на Наковски Волеј важеше за фаворит со оглед на тоа дека за скопскиот тим ова беше прво учество во полуфиналето од куп-натпреварувањето. Одбојкарките на Фит Фан Волеј се потрудија да понудат поквалитетен отпор, но тоа единствено им успеа во вториот сет.
Во дуелот кој го имаше епитетот „финале пред финалето“ Јанта Волеј КВ комплетно го надигра Работнички Скопје, 3:0 (26:24, 25:11, 25:19). Неизвесно беше единствено во првиот сет, кој буквално се играше поен за поен, за во рулет финишот, одбојкарките на Јанта да ја искористат втората сет топка за водство од 1:0. Работнички имаше драстичен пад во играта во продолжението, додека на противникот се чинеше дека се му оди од рака предводен од Мери Бошковска.
Женското финале се игра на 5 април (сабота) од 16 часот во салата „25. Мај“ во Радовиш и ќе биде увертира за машкото финале од Купот на ОФМ, во кое од 19 часот се соочуваат бранителот на титулата Штип УГД и Струмица.
