Претседателот на Одбојкарската федерација на Македонија, Петар Јовановски и генералниот секретар Филип Деспотовски ќе присуствуваат на 26. Генерално собрание на Балканската одбојкарска асоцијација (БВА), кое ќе се одржи утре (25 јануари) во Тирана, Албанија.
Актуелниот претседател на БВА и на Албанската одбојкарска федерација, Ерлинд Пељумби ќе претседава на Собранието, на кое покрај претставниците на единаесетте земји – членки на Асоцијацијата ќе присуствува и Роко Сикириќ, претседател на Европската одбојкарска конфедерација (ЦЕВ).
Агендата на Генералното собрание ќе вклучува извештаи за активностите на БВА во 2024 година, финансиски извештај, како и дефинирање на натпреварувањата во одбојка и одбојка на песок во 2025 година, како и можните организатори.
Еднa од најинтересните точки на дневниот ред е разгледувањето на апликацијата на Одбојкарската федерација на Малта за влез во балканското одбојкарско семејство.
