Екипата на Работнички Скопје е главна сила во македонската женска одбојка во последниве неколку години, а денеска ќе има шанса да ја потврди оваа теза со победа на гостувањето кај Струмица жени во третиот натпревар од финалната серија во трката за шампионската титула. Актуелните првенки завршија на третата позиција по основниот дел од сезоната, но го елиминираа составот на Јанта волеј, а ги добија и првите две средби со Струмица жени, што значи дека се на чекор до третиот шампионски прстен едноподруго, четврти од 2019-та досега.
Без разлика што имаа само еден пораз на 20 мечеви во лигашкиот сегмент, а го освоија и пехарот во купот, одбојкарките на Струмица жени на првите две соочувања од финалето не освоија ниту еден сет. Тоа ги става под притисок денеска да не смеат да згрешат на свој терен, а доколку најдат сили да ја остварат петтата победа во осмиот меѓусебен дуел сезонава, ќе намалат на 2-1 во финалето и ќе се изборат за нов натпревар во главниот град. Другата опција е Работнички Скопје уште денеска да се радува на титула. Преносот е на МРТ-3 од 18 часот.
Финале (жени) – до три добиени натпревари
Струмица жени – Работнички Скопје 0:3 (24:26, 23:25, 17:25)
Работнички Скопје – Струмица жени 3:0 (28:26, 25:20, 25:21)
Струмица жени – Работнички Скопје (сабота 20.04.2024, МРТ-3, 18.00)
Работнички Скопје – Струмица жени (вторник 23.04.2024)
Струмица жени – Работнички Скопје (петок 26.04.2024)
