Деветте титули од 2012-та досега, а вкупно десет, како и билансот во меѓусебните дуели сезонава (4-1), сугерира дека машкото лигашко финале во натпреварувчката 2023/24-та може да трае три натпревари. Но, се зависи од денешниот во салата „Јордан Мијалков“ во Штип со почеток од 19 часот (пренос на МРТ-3). Одбојкарите на Штип УГД веќе направија голем резултат со освојувањето на купот, па пред своја публика ќе се обидат да го повторат подвигот од 24-ти март кога на истото место ја искористија предноста на домашниот терен, ја совладаа Струмица 47&72 и го прославија првиот пехар во клупските витрини.
Фактот што струмичани беа детронизирани во купот им дава доза на претпазливост пред денешното гостување кај Штип УГД што може да биде сосема доволно за предност од 2-0 во финалната серија. Доколку се случи тоа, шампионот ќе има меч-топка за титула в понеделник во Струмица, а во спротивно, штипјани ќе обезбедат уште еден натпревар дома којшто би бил четврти во низата за првенствениот пехар.
Финале (мажи) – до три добиени натпревари
Струмица 47&72 – Штип УГД 3:1 (25:19, 25:18, 23:25, 25:22)
Штип УГД – Струмица 47&72 (петок 19.04.2024, МРТ-3, 19.00)
Струмица 47&72 – Штип УГД (понеделник 22.04.2024, МРТ-3, 19.00)
Штип УГД – Струмица 47&72 (четврток 25.04.2024)
Струмица 47&72 – Штип УГД (недела 28.04.2024)
