Со оглед на резултатите на првите натпревари и формата на екипите, можно е уште викендов да завршат полуфиналните серии од разигрувањето во македонскиот одбојкарски шампионат. Бранителот на тронот, Струмица 47&72, повторно ќе игра пред своја публика против Универзитет во Тетово, но не само поради тоа, туку и поради објективниот квалитет, уште утре се очекува да обезбеди пласман во финалната низа. Тоа можат да го сторат и одбојкарите на Работнички 71&22, коишто славеа над Штип УГД во првата пресметка на свој терен, така што со нов успех во Штип ќе се изборат за прво финале. Доколку освојувачот на купот го врати ударот, ќе има мајсторка во вторник во Скопје.
Кај дамите, екипите на Струмица жени и Работнички Скопје лесно триумфираа во првите дуели против своите противнички, така што може да се случи да закажат финале по натпреварите викендов. Куп освојувачките, одбојкарките на Струмица жени, ќе одат кај Наковски волеј за целосен успех во локалниот двобој, а Работнички Скопје ќе го пречека Јанта волеј со надеж дека ќе го добие соочувањето со големиот ривал со 2-0 во победи. МРТ ќе реализира пренос од овој натпревар, в недела од 20 часот на третиот канал.
Викендов одговор ќе добие уште едно се уште отворено прашање, а тоа е кој ќе биде последен учесник во прволигашката женска конкуренција наредната сезона. Вардар ЕМ славеше над Газели волеј со 3:0 во првата средба од баражот, па има голема шанса да остане во елитата и во натпреварувачката 2024/25.
Прва лига (мажи), полуфинале, први натпревари
Струмица 47&72 – Универзитет во Тетово (1-0) (сабота, 16.00)
Штип УГД – Работнички 71&22 (0-1) (недела, 18.00)
Прва лига (жени), полуфинале, први натпревари
Наковски волеј – Струмица жени (0-1) (сабота, 19.00)
Работнички Скопје – Јанта волеј (1-0) (недела, 20.00, МРТ-3)
Бараж за Прва лига (втор натпревар)
Вардар ЕМ – Газели волеј (1-0) (сабота, 17.00)
