Струмица жени и Јанта волеј ќе играат во финалето на 31-то издание на женскиот одбојкарски куп на Македонија. Подобропласираните екипи во првенството денеска ги добија полуфиналните пресметки на завршниот турнир во салата „Јордан Мијалков“. Струмица жени со пресврт го детронизира Работнички Скопје со 3:2 (24:26, 24:26, 25:22, 25:17, 15:13) со извонредно издание на Душка Здјелар која освои 38 поени.
Јанта волеј се избори за шесто куп финале со триумф над Наковски волеј со 3:1 (25:19, 19:25, 25:20, 25:16). Тетјана Машковска со 23 поени беше најефикасна на мечот по којшто Јанта волеј ќе игра за вториот пехар во натпреварувањето откако на првиот му се израдува во 2021-ва.
Женското финале е в недела од 12, а машкото меѓу Струмица 47&72 и домаќинот Штип УГД од 15 часот, со преноси на третиот канал на Македонската телевизија.
